தவறான சிகிச்சையால் சிறுவனின் பிறப்புறுப்பு அகற்றப்பட்டதாக பெற்றோர் குற்றச்சாட்டு

காரைக்குடி, ஜூன் 6- காரைக்குடி புதுசந்தையை சேர்ந்தவர் மீனாட்சிசுந்தரம், தனலெட்சுமி. இவர்களுக்கு 10 வயதில் சாய்ஹரிஸ் என்ற ஆண் குழந்தை உள்ளது. அவருக்கு கடந்த மாதம் சிறுநீர் கழிக்கும் ஆண் உறுப்பில் அரிப்பு ஏற்பட்டதால் காரைக்குடி தாலுகா அலுவலக சாலையில் உள்ள தனியார் மருத்துவமனையில் சென்று பார்த்த போது, அவர் ஆண் உறுப்பில் உள்ள தோலை அறுவைச் சிகிச்சை செய்ய வேண்டும் என்று கூறியுள்ளார். இதன்படி கடந்த மே மாதம் 21-ம் தேதி அதே மருத்துவமனையில் வேறு ஒரு மருத்துவர் அறுவை சிகிச்சை செய்துள்ளார். டிஸ்சார்ஜ் ஆகி வீட்டிற்கு வந்த பிறகு சிறுவனின் ஆண் உறுப்பு கருத்துள்ளது. சிறுநீர் போகாமல் வலியால் சிறுவன் துடித்துள்ளான். இதையடுத்து பெற்றோர் காரைக்குடி தாலுகா அலுவலக ரோட்டில் உள்ள மருத்துவமனை டாக்டரிடம் காண்பித்துள்ளனர். அவர் நான் ஆப்ரேஷன் செய்யவில்லை. ஆப்ரேஷன் செய்த மருத்துவரிடம்தான் நீங்கள் சென்று காட்ட வேண்டும் என்று பொறுப்பற்ற முறையில் பதிலளித்துள்ளார். அங்கு பெற்றோர் சிறுவனை அழைத்து சென்றபோது, அவர்கள் அட்மிஷன் போட்டு, தையலை மயக்கமருந்து கொடுத்து நீக்கியுள்ளனர். இதுனால் சிறுவனுக்கு வலி அதிகரித்துள்ளது. இதையடுத்து அவர்கள் டாக்டர்களிடம் கேட்க அவர்கள் மதுரையில் நாங்கள் சொல்லும் மருத்துவமனையில் காண்பியுங்கள் என கூறி அலைக்கழித்துள்ளனர். சிறுவனின் பெற்றோர் அந்த மருத்துவமனைக்கு செல்லாமல் மதுரை மீனாட்சிமிஷன் மருத்துவமனையில் உள்ள யூராலஜி டாக்டரிடம் காண்பித்தபோது, மருத்துவர்கள் ஆண் உறுப்பு பகுதி கருத்து பாதிப்புக்கு உள்ளாகி விட்டது. உடனடியாக அந்த பகுதியை ஆப்ரேசன் மூலம் நீக்கி ஆக வேண்டும் இல்லை என்றால் உயிருக்கு ஆபத்தாகிவிடும் என்று கூறியுள்ளனர். இதையடுத்து பெற்றோர்கள் உயிரை காப்பாற்றினால் போதும் என்ற சூழ்நிலையில் தள்ளப்பட்டு ஆப்ரேஷன் செய்ய ஒப்புக் கொண்டனர். ஆப்ரேஷன் முடிவில் சிறுவனின் பிறப்புறப்பு அகற்றப்பட்டது.

காரைக்குடியில் உள்ள இரண்டு டாக்டர்களும் இணைந்து தவறான ஆப்ரேசன் செய்து விட்டு தவறை மறைத்து என் மகனின் எதிர்கால வாழ்க்கையை அழித்து விட்டனர். இந்த நிலைக்கு தள்ளிய மருத்துவர்கள் மீது சட்டப்பூர்வமாக நடவடிக்கை எடுத்து மகனுக்கு நீதி விசாரணை செய்து நடவடிக்கை எடுக்க வேண்டி பெற்றோர் காரைக்குடி உதவி காவல் கண்காணிப்பாளர் ஆஷிஷ் புனியாவிடம் புகார் அளித்துள்ளனர். அதன் அடிப்படையில் போலீசார் விசாரணை மேற்கொண்டு வருகின்றனர்.