காரைக்குடியில் கனிம வள துறை அமைச்சர் வீடு, கட்சி அலுவலகம் அருகே போலீசார் குவிப்பு

காரைக்குடி, ஜூலை 18- புதுக்கோட்டை மாவட்டம் திருமயம் தாலுகா குளவாய்ப்பட்டியில் எஸ்.டி., இன்ப்ரா என்ற பெயரில் தனியார் குவாரி ஏற்கனவே செயல்பட்டு வருகிறது. தற்போது புதிய குவாரிக்கு அனுமதி கேட்டுள்ளதாகவும் புதியபாதை அமையக்கூடாது என அந்த பகுதி கிராம மக்கள் குவாரியை மூட வலியுறுத்தி பல்வேறு முறை மனு கொடுத்தும் எந்த பலனும் இல்லை என கூறப்படுகிறது. இந்நிலையில் புதிதாக அந்த குவாரிக்கு லைசன்ஸ் வழங்கக் கூடாது, குவாரியால் பொதுமக்களுக்கு பல்வேறு பிரச்சினை

உள்ளது, எனவே அதை மூட வலியுறுத்தி குளவாய்பட்டி ஊர்மக்கள் இன்று கனிமவளத்துறை அமைச்சர் டாக்டர் பிரபு வீட்டை முற்றுகையிட உள்ளதாக போலீசாருக்கு தகவல் கிடைத்தது. இதையடுத்து இன்று காலை முதல் காரைக்குடி ASP ஆஷிஷ் புனியா தலைமையில் முடியரசனார் சாலையில் உள்ள கனிம வளத் துறை அமைச்சர் வீடு மற்றும் கட்சி அலுவலகம் செல்லும் பாதையில் தடுப்புகள் அமைத்து 100க்கும் மேற்பட்ட போலீசார் பாதுகாப்பு பணியில் ஈடுபட்டுள்ளனர். இதனால் இப்பகுதியில் பரபரப்பு ஏற்பட்டுள்ளது.