காரைக்குடியில் சிங்கப்பெண் காவலர்கள் தீவிர ரோந்து மற்றும் விழிப்புணர்வு பணிகளில் ஈடுபட்டனர்

காரைக்குடி, ஜூன் 13- காரைக்குடி ரயில் நிலையத்தில் சிங்கப்பெண் காவல் உதவி ஆய்வாளர் கங்காதேவி தலைமையில் இரு சிங்கப்பெண் காவலர்கள் திடீர் ஆய்வு மேற்கொண்டனர். காரைக்குடியில் இருந்து திருச்சிக்கு செல்லும் பயணிகள் இரயிலில் பெண் பயணிகளிடம், காவலன் செயலியை பதிவேற்றம் செய்ய வைத்தனர். அதுபோல் காரைக்குடி பேருந்து நிலையம், உள்ளிட்ட மக்கள் அதிகம் கூடும் இடங்களுக்கு நேரடியாகச் சென்ற பெண் காவலர்கள், மாணவிகள், பெண்கள் மற்றும் பொதுமக்களிடம் சிங்கப்பெண் அதிரடி திட்டம் குறித்து விளக்கமளித்தனர். பெண்கள் மற்றும் குழந்தைகளுக்கு ஏதேனும் அச்சுறுத்தல், பாலியல் தொந்தரவு அல்லது சந்தேகத்திற்கிடமான சம்பவங்கள் ஏற்பட்டால் உடனடியாக 1098 குழந்தைகள் உதவி எண் மற்றும் 181 மகளிர் உதவி எண் ஆகியவற்றை தொடர்புகொள்ளலாம் என அறிவுறுத்தினர்.

"குற்றம் நடந்த பிறகு நடவடிக்கை எடுப்பதை விட, குற்றம் நடப்பதற்கு முன்பே அதைத் தடுத்து நிறுத்துவதே இந்த திட்டத்தின் முக்கிய நோக்கம்" என காவல்துறையினர் தெரிவித்தனர். மேலும், எந்தவித பயமும் தயக்கமும் இன்றி பெண்கள் மற்றும் குழந்தைகள் தங்களது பிரச்சினைகளை காவல்துறையிடம் தெரிவிக்கலாம் என்றும், அவர்களின் பாதுகாப்பை உறுதி செய்ய காவல்துறை எப்போதும் துணை நிற்கும் என்றும் நம்பிக்கையூட்டினர்.