சேது பாஸ்கரா வேளாண்மைக் கல்லூரி பட்டமளிப்பு விழா;

காரைக்குடி, ஜூன் 15 - காரைக்குடி அருகே விசாலயன்கோட்டையில் அமைந்துள்ள சேது பாஸ்கரா வேளாண்மைக் கல்லூரி மற்றும் ஆராய்ச்சி நிறுவனத்தின் 6-ஆவது ஆண்டு பட்டமளிப்பு விழாவும், இந்தியன் புக் ஆஃப் ரெக்கார்ட்ஸ் பதிவு நிகழ்ச்சிக்காக 15 நிமிடங்களில் 6,600 மரக்கன்றுகள் நடும் விழாவும் நடந்தது. கல்லூரி தலைவர் முனைவர் சேது குமணன் தலைமை வகித்தார். முதல்வர் பேபி ராணி வரவேற்று பேசினார். விழாவின் சிறப்பு விருந்தினராக மைசூர் அரச குடும்பத்தைச் சேர்ந்த மகாராஜா ஸ்ரீ யதுவீர் கிருஷ்ணதத்த சாமராஜ உடையார் ( நாடாளுமன்ற உறுப்பினர் மைசூர் குடகு தொகுதி) பட்டமளிப்பு உரையாற்றினார். அவர் பேசுகையில், மாணவர்கள் தங்களது அறிவு, திறன் மற்றும் சமூகப் பொறுப்புணர்வை ஒருங்கிணைத்து நாட்டின் முன்னேற்றத்திற்கும், நிலையான வளர்ச்சிக்கும் பங்களிக்க வேண்டும் என்றார். மியான்மர் குடியரசின் கௌரவத் தலைவர் பேராசிரியர் ஜெ. ரங்கநாதன், மருத்துவத் தரப்படுத்தல் துணைக்குழு மற்றும் யுனானி மருத்துவ ஆராய்ச்சிக்கான துணைக்குழுத் தலைவர் முனைவர் இராஜேந்திரன் ஆனைமுத்து, டிஜி அக்ரிகான் நிறுவனத்தின் நிறுவனர் மற்றும் நிர்வாக அலுவலர் செந்தில்குமார் ஆகியோர் சிறப்பு விருந்தினர்களாக கலந்து கொண்டனர். தொடர்ந்து மாணவ, மாணவியர்களுக்கு பட்டங்கள் வழங்கப்பட்டன. கல்வி மற்றும் இணைப்பாடச் செயல்பாடுகளில் சிறந்து விளங்கிய மாணவர்களுக்குத் தங்கப் பதக்கங்கள், அறக்கட்டளை விருதுகள், சான்றிதழ்கள் மற்றும் சிறப்புப் பரிசுகள் வழங்கப்பட்டன. டாக்டர் ஏ.பி.ஜே. அப்துல் கலாம் விருது செ. அழகுமீனா மற்றும் ரா. சுபாஷினி ஆகியோருக்கு வழங்கப்பட்டது. கல்வி மற்றும் இணைப்பாடச் செயல்பாடுகளில் சிறந்து விளங்கியதற்காக சேது பாஸ்கரன் சிறப்புச் சான்றிதழ் விருது எஸ்.ஐரின் ஐஸ்டினாவிற்கு வழங்கப்பட்டது. டாக்டர் எம்.எஸ். சுவாமிநாதன், டாக்டர் பி. வசந்தராஜ் டேவிட், டாக்டர் சி.வி. சுப்பிரமணியன், டாக்டர் ரத்தன்லால், டாக்டர் கிரிகோர் மெண்டல், டாக்டர் ஜி.எஸ். ரந்தாவா மற்றும் டாக்டர் அமர்த்யா சென் ஆகியோரின் பெயர்களில் நிறுவப்பட்ட விருதுகளும், சேது ஐராணி அம்மாள் பெயரில் சிறப்புச் சான்றிதழ்களும் மாணவர்களுக்கு வழங்கப்பட்டன.

முன்னதாக இந்தியன் புக் ஆஃப் ரெக்கார்ட்ஸ் பதிவு முயற்சியின் ஒரு பகுதியாக, கல்லூரி பண்ணை வளாகத்தில் 15 நிமிடங்களில் 6,600 மரக்கன்றுகள் நடப்பட்டது. மைசூர் மகாராஜா ஸ்ரீ யதுவீர் கிருஷ்ணதத்த சாமராஜ உடையார் முன்னிலையில் நடைபெற்ற இந்நிகழ்வில், மத்திய தொழில்துறை பாதுகாப்புப் படை (CISF), ஸ்ரீ ராஜா ராஜன் பொறியியல் மற்றும் தொழில்நுட்பக் கல்லூரி அமராவதி புதூர், ஸ்ரீ சாரதா நிகேதன் மகளிர் கல்லூரி அமராவதி புதூர், சேது ஐராணி மெட்ரிகுலேஷன் பள்ளி, கண்டரமாணிக்கம் சேது பாஸ்கரா தொழிற்பயிற்சி நிறுவனம் (ITI), கண்டரமாணிக்கம், எம்.ஏ.பி. பெண்கள் மேல்நிலைப்பள்ளி கண்டரமாணிக்கம் மற்றும் அரசு மேல்நிலைப்பள்ளி, விசாலையன்கோட்டை ஆகிய கல்வி மற்றும் நிறுவனங்களைச் சேர்ந்த மாணவர்கள், ஆசிரியர்கள் தன்னார்வலர்கள் மரக்கன்றுகளை நட்டனர். இந்நிகழ்வை இந்தியன் புக் ஆஃப் ரெக்கார்ட்ஸ் பதிவு மேலாளர் முனைவர் யு. இராஜேஷ், பொதுமேலாளர் முனைவர் பா. பாலசுப்பிரமணியன் ஆகியோர் நேரில் ஆய்வு செய்தனர். 15 நிமிடங்களில் 6,600 மரக்கன்றுகள் நடப்பட்ட சாதனையை உறுதிப்படுத்தி, இந்தியன் புக் ஆஃப் ரெக்கார்ட்ஸ் சார்பில் உலக சாதனைச் சான்றிதழ் மற்றும் விருதுகளை வழங்கினர். மேலும், கல்வி, சமூகப் பொறுப்பு மற்றும் சுற்றுச்சூழல் பாதுகாப்பு நடவடிக்கைகளில் தொடர்ந்து சிறப்பாகச் செயல்பட்டு வருவதற்காக, இந்தியன் புக் ஆஃப் ரெக்கார்ட்ஸ் "மாஸ்டர் மைண்ட் விருது" சேது பாஸ்கரா வேளாண்மைக் கல்லூரி மற்றும் ஆராய்ச்சிநிறுவனத்தின் தலைவர் முனைவர் சேது குமணனுக்கு வழங்கப்பட்டது.