காரைக்குடி செட்டிநாடு பப்ளிக் பள்ளியில் மதுரை சகோதயா செஸ் போட்டி

காரைக்குடி, ஜூன் 29- காரைக்குடியில் உள்ள செட்டிநாடு பப்ளிக் பள்ளியில் மதுரை சகோதயா பள்ளிகள் காம்ப்ளக்ஸ் சார்பில் மண்டலம்–5 அளவிலான செஸ் போட்டி நடைபெற்றது. பள்ளி முதல்வர் ராமசுப்பிரமணியன் வரவேற்புரை வழங்கினார். பள்ளியின் சேர்மன் எஸ்.பி. குமரேசன் தொடங்கி வைத்தார். மதுரை சகோதயா காம்ப்ளக்ஸ் சார்பில் அப்சர்வராக எஸ்.ஆர்.வி.வி. பள்ளி முதல்வர் ஷானு சையத் பங்கேற்று போட்டிகளை பார்வையிட்டார். மேலும், எஸ்.ஆர்.வி.வி. பள்ளியின் சீனியர் முதல்வர் ஆண்டனி சாமி விக்டர் மற்றும் கிருஷ்ணா இன்டர்நேஷனல் பள்ளி உடற்கல்வி ஆசிரியர் ஜெ. செல்வம் ஆகியோர் ஒருங்கிணைத்தனர். சிவகங்கை, புதுக்கோட்டை மற்றும் ராமநாதபுரம் மாவட்டங்களைச் சேர்ந்த 22-க்கும் மேற்பட்ட பள்ளிகளில் இருந்து 126-க்கும் மேற்பட்ட மாணவ, மாணவியர்கள் 12, 14, 17 மற்றும் 19 வயதுக்குட்பட்ட ஆண்கள் மற்றும் பெண்கள் ஆகிய எட்டு பிரிவுகளில் விளையாடினர். மாலை நடைபெற்ற நிறைவு விழாவிற்கு செட்டிநாடு பப்ளிக் பள்ளியின் சேர்மன் எஸ்.பி. குமரேசன் தலைமை தாங்கினார்.

அவர் பேசுகையில், முயற்சி செய்தால் முடியாதது எதுவும் இல்லை. நம் குறிக்கோளை அடைய தொடர்ந்து முயற்சியும் கடின உழைப்பும் இருந்தால் நிச்சயமாக வெற்றியை அடையலாம். போட்டியில் பங்குபெற்ற மாணவர்கள் தொடர்ந்து தங்களது திறமைகளை வளர்த்துக் கொள்ள வேண்டும், என்றார். ஒவ்வொரு பிரிவிலும் முதல், இரண்டாம் மற்றும் மூன்றாம் இடங்களைப் பெற்ற மாணவ, மாணவியர்களுக்கு பள்ளியின் சேர்மன் குமரேசன் பரிசுகள் மற்றும் சான்றிதழ்களை வழங்கினார். பள்ளியின் துணை முதல்வர் பிரேமா சித்ரா நன்றி கூறினார். நிகழ்ச்சிக்கான ஏற்பாடுகளை செட்டிநாடு பப்ளிக் பள்ளி நிர்வாகம் மற்றும் ஆசிரியர்கள் சிறப்பாக மேற்கொண்டனர்.