காரைக்குடி10 வயது சிறுவனுக்குதவறான சிகிச்சை அளித்த புகாரில் மருத்துவர்கள் இருவர்மீது வழக்குபதிவு

காரைக்குடி, ஜூன் 8- காரைக்குடி தனியார் மருத்துவமனையில் தவறான அறுவை சிகிச்சையால் சிறுவன் பிறப்பு உறுப்பு இழந்ததாக பெற்றோர் அளித்த புகாரின் அடிப்படையில் தனியார் மருத்துவமனை மருத்துவர்கள் காரைக்குடி மீது வடக்கு போலீசார் வழக்கு பதிவு செய்துள்ளனர். சிவகங்கை மாவட்டம், காரைக்குடியைச் சேர்ந்தவர் மீனாட்சிசுந்தரம். இவர் தனியார் நகை பட்டறையில் பணிபுரிகிறார். இவரது மனைவி தனலெட்சுமி. இவர்களது 10 வயது மகனுக்கு தனியார் மருத்துவமனையில் தவறான சிகிச்சை அளித்ததால், பிறப்புறுப்பை (ஆண் உறுப்பை ) இழந்ததாக காரைக்குடி உதவி காவல் கண்காணிப்பாளர் ஆஷிஷ் புனியாவிடம் புகார் கொடுத்தனர். அந்த புகாரில், எங்களுக்கு ஒரே ஒரு மகன் மட்டுமே உள்ளான். அவனுக்கு சிறுநீர் கழிப்பதில் பிரச்சினை இருந்து வந்தது. இதையடுத்து, தனியார் மருத்துவமனையில் அனுமதித்தோம். அங்கு அவனுக்கு மே 21-ம் தேதி அறுவைசிகிச்சை செய்தனர். சிகிச்சை முடிந்து வீட்டுக்குச் சென்ற சில நாட்களிலேயே எனது மகனின் பிறப்புறுப்பு அழுகியது. இதுகுறித்து அறுவைசிகிச்சை செய்த தனியார் மருத்துவமனை மருத்துவரிடம் கூறினேன். அப்போது, வேறொரு மருத்துவர் தான் அறுவைசிகிச்சை செய்ததாக கூறி, அவரது மருத்துவமனைக்கு அனுப்பி வைத்தார். அங்கு சென்றபோது அந்த மருத்துவரும் முறையாக பதிலளிக்காமல் அலைக்கழித்தார். அதற்குள் எனது மகனின் உடல்நிலை மோசமானது. இதையடுத்து மதுரை தனியார் மருத்துவமனையில் அனுமதித்தோம்.

அங்கு மருத்துவர்கள் எனது மகனின் பிறப்புறுப்பு அழுகிவிட்டதால், அகற்றினால் தான் உயிர் பிழைக்க முடியும் என்று கூறிவிட்டனர். நாங்களும் எனது மகனை காப்பாற்றுவதற்காக வேறுவழியின்றி ஒப்புக் கொண்டோம். பின்னர் அறுவைசிகிச்சை செய்து பிறப்புறுப்பை அகற்றிவிட்டனர். தனியார் மருத்துவமனையின் தவறான சிகிச்சையால் எனது மகனின் வாழ்க்கையே பாழாய்போய்விட்டது. இதனால் தனியார் மருத்துவமனை மீதும், சம்பந்தப்பட்ட மருத்துவர்கள் மீதும் நடவடிக்கை எடுக்க வேண்டும் என கூறியிருந்தார். அதன் அடிப்படையில் காரைக்குடி வடக்கு போலீசார் இரு மருத்துவர்கள் மீது வழக்கு பதிவு செய்துள்ளனர்.