பணம் பெற்று மோசடியில் ஈடுபட்ட தனியார் டைல்ஸ் நிறுவனம்

காரைக்குடி, ஆக.21- காரைக்குடியில் வீடு கட்டும் உரிமையாளருக்கு டைல்ஸ் கொடுக்காமல், ஏமாற்றிய தனியார் டைல்ஸ் நிறுவன மேலாளர் மீது போலீசார் வழக்கு பதிவு செய்துள்ளனர். காரைக்குடி கங்காதரன் தெருவை சேர்ந்தவர் நிர்மல் பவித்ரன். இவர் கழனிவாசலில் அவருக்கு சொந்தமான இடத்தில் வீடு கட்டி வருகிறார். இதற்கு டைல்ஸ் பதிக்கும் பொருட்டு காரைக்குடி நூறடி ரோட்டில் உள்ள தனியார் டைல்ஸ் நிறுவனத்தில் டைல்ஸ் ஆர்டர் செய்திருந்தார். அதன்படி அந்நிறுவனத்திற்கு கடந்த ஜனவரி மாதம் 21-ம் தேதி ரூ.3,52,600-ஐ மனுதாரரின் அக்கவுண்டிற்கு கிரெடிட் கார்டு மூலமாகவும், ரூ.2,62,000 மற்றும் ரூ.90 ஆயிரத்தை ரொக்கமாகவும் அந்நிறுவன மேலாளர் மீனாள் பரிந்துரையின்படி கொடுத்துள்ளார். ஆனால் டைல்ஸ் நிறுவனம் உரிய நேரத்தில் பொருட்களை வழங்கவில்லை. இது குறித்து நிர்மல் பவித்ரன் அந்நிறுவனத்தில் நேரில் சென்று கேட்டபோது, நீங்கள் ஒப்பந்தகாரர் பிரபாகர் என்பவர் மூலம்தான் டைல்ஸ் எடுத்தீர்கள். எனவே நீங்கள் கொடுத்த பணத்தை அவர் கணக்கில் வரவு வைத்துவிட்டோம் என கூறியுள்ளனர்.

அவர்களிடம் நிர்மல் பவித்ரன், ‘‘பிரபாகர் வெறும் லேபர் ஒப்பந்தம் மட்டுமே போட்டுள்ளார். கட்டட பொருட்களை நான்தான் வாங்கி கொடுக்கிறேன். மேலும் பணம் கொடுக்கும்போது, பிரபாகர் நேரில் வரவில்லை. இது குறித்து எந்த தகவலையும் என்னிடம் தெரிவிக்கவில்லை, என கேட்டபோது, நிறுவன மேலாளர் மீனாள், அவர்களிடம் ‘‘பிரபாகர் போன் செய்து அவரது கணக்கில் வரவு வைக்க கூறியதாக கூறினார், என கூறியதுடன், நிர்மல் பவித்ரனை தகாத வார்த்தையால் மிரட்டி, வெளியே அனுப்பியுள்ளனர். இது குறித்து நிர்மல் பவித்ரன் காரைக்குடி வடக்கு போலீசில் புகார் அளித்தார். அதன் அடிப்படையில் மோசடியில் ஈடுபட்டதுடன், வாடிக்கையாளரை மிரட்டிய தனியார் டைல்ஸ் நிறுவனத்தின் மீதும் மேலாளர் மீனாள் மீதும் வழக்கு பதிவு செய்து விசாரித்து வருகின்றனர்.