பள்ளத்தூர் அருகே ஒன்றரை டன் ரேஷன் அரிசி பறிமுதல் – டிரைவர் தப்பியோட்டம்

காரைக்குடி, செப்.28- காரைக்குடி பள்ளத்தூர் அருகே வேலங்குடி பகுதியில் போலீசார் வாகன சோதனையில் ஈடுபட்டிருந்தனர். அப்போது ஆவுடைப்பொய்கையில் இருந்து பள்ளத்தூர் நோக்கி வந்த வேனை போலீசார் சோதனைக்காக நிறுத்த முயன்றனர். போலீசாரை கண்டதும் வேனை நிறுத்திய டிரைவர், அங்கிருந்து தப்பி ஓடினார். இதையடுத்து போலீசார் வேனை சோதனை செய்தபோது, அதில் சுமார் ஒன்றரை டன் ரேஷன் அரிசி இருப்பது தெரியவந்தது. தொடர்ந்து ரேஷன் அரிசியை பறிமுதல் செய்த போலீசார், அதை குடிமைப் பொருள் வழங்கல் மற்றும் குற்றப் புலனாய்வுத் துறை அதிகாரிகளிடம் ஒப்படைத்தனர். மேலும், தப்பியோடிய வேன் டிரைவரை பள்ளத்தூர் காவல்துறையினர் தேடி வருகின்றனர்.

பள்ளத்தூர் மற்றும் சுற்றுவட்டாரப் பகுதிகளில் ரேஷன் அரிசி கடத்தல் தொடர்ந்து நடைபெற்று வருவதாக கூறப்படும் நிலையில், இதனைத் தடுக்க அதிகாரிகள் தீவிர நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனர்.