காரைக்குடியில் தமிழாசிரியர் கழகத் தேர்தலில் விதிமீறல் புகார்: தேர்தல் அலுவலருடன் ஆசிரியர்கள் வாக்குவாதத்தால் பரபரப்பு

காரைக்குடி, செப்.5- ​சிவங்கை மாவட்டம் காரைக்குடியில் நடைபெற்ற தமிழகத் தமிழாசிரியர் கழக மாநிலத் தேர்தலில் பல்வேறு முறைகேடுகள் நடந்துள்ளதாகக் கூறி, தேர்தலை உடனடியாக நிறுத்த வலியுறுத்தி உரிமை மீட்புக் குழுவினர் தேர்தல் அலுவலர்களுடன் கடுமையான வாக்குவாதத்தில் ஈடுபட்டதால் அப்பகுதியில் பெரும் பரபரப்பு ஏற்பட்டது. காரைக்குடியில் தமிழக தமிழாசிரியர் கழக மாநில தேர்தல் நடைபெற்றது. இதில் பல்வேறு முறைகேடுகள் நடந்துள்ளதாக கூறி 12 மாவட்டங்களை சேர்ந்தவர்கள் எதிர்ப்பு தெரிவித்தனர். அவர்கள் கூறுகையில், இன்று நடந்த தேர்தலில் தமிழகத்தின் 38 மாவட்டங்களில் பெரம்பலூர் மாவட்டம் முற்றிலுமாகப் புறக்கணிக்கப்பட்டுள்ளது. 25-க்கும் மேற்பட்ட மாவட்டங்களில் முறையான தேர்தல் நடத்தப்படவில்லை. தலைமையால் நேரடியாக நியமிக்கப்பட்ட பொதுக்குழு உறுப்பினர்களை மட்டுமே வைத்து வாக்குப்பதிவு நடத்தப்படுகிறது. மாநில வரவு-செலவு கணக்குகளைப் பொதுக்குழுவில் சமர்ப்பிக்கவில்லை. குற்றாலத்தில் நடைபெற்ற மாவட்ட விழாவைப் பொதுக்குழுவாகப் போலியாக சித்தரித்து

எந்தவிதத் தீர்மானமும் நிறைவேற்றாமல் தலைமை தன்னிச்சையாகத் தேர்தல் தேதியை அறிவித்துள்ளது. பல மாவட்ட உறுப்பினர்களின் பெயர்கள் திட்டமிட்டு விடுபட்டுள்ளன. மேலும், வாக்காளர் பட்டியல் அனைத்து உறுப்பினர்களுக்கும் வெளிப்படையாக வழங்கப்படாமல் சிலருக்கு மட்டுமே தரப்பட்டுள்ளது. பதவி உயர்வு பெற்று 12 ஆண்டுகளாகப் பொறுப்பில் தொடரும் தலைமையாசிரியர்களே மீண்டும் அதிகாரத்திற்கு வரும் வகையில் தேர்தல் ஒருதலைப்பட்சமாக நடத்தப்படுகிறது, என்றனர். இந்நிலையில், ​இத்தேர்தலை உடனடியாக நிறுத்தி வைக்கக்கோரி 12 மாவட்டங்களைச் சேர்ந்த தமிழ் ஆசிரியர்கள் தேர்தல் ஆணையாளரிடம் மனு அளிக்க முயன்றனர். ஆனால், அம்மனுவைப் பெற அவர் மறுத்ததால் தேர்தல் களத்தில் கடும் மோதல் சூழல் நிலவியது. இறுதியாக எந்தவித முடிவும் எட்டப்படாத நிலையில், ஆசிரியர்கள் கலைந்து சென்றனர்.