காரைக்குடியில் பட்டப்பகலில் வீட்டின் பூட்டை உடைத்த கொள்ளையர்கள்

காரைக்குடி, ஜூலை 31- காரைக்குடியில் பட்டப்பகலில் வீட்டின் பூட்டை உடைத்து கொள்ளையடிக்க முயன்று தப்பி ஓடிய கும்பலை போலீசார் தேடி வருகின்றனர். காரைக்குடி அருகே ஆவுடைபொய்கை - வேலங்குடி சாலை கடம்பவனம் பகுதி செட்டிநாடு அவென்யூபகுதியில் வசிப்பவர் கார்த்திகேயன். இவர் திருமயம் பெல் நிறுவனத்தில் வெல்டராக வேலை செய்து வருகிறார். இவர் வீட்டை பூட்டி விட்டு குடும்பத்துடன் சுற்றுலா சென்றுள்ளார். இந்நிலையில் நேற்று பிற்பகலில் காரில் வந்த ஒரு கும்பல் வீட்டின் பூட்டை உடைத்து, கேமராக்களை உடைத்து திருட்டு சம்பவத்தில் ஈடுபட்டுள்ளது. அப்போது எதிரே தோட்டம் வைத்துள்ள ஆசிரியர் ஒருவர் வீட்டின் முன்பு அடையாளம் தெரியாத கார் நிற்பதை பார்த்து, சத்தம் போட்டுள்ளார். அவர் சத்தம் போட்டதை பார்த்த அக்கும்பல் கையில் இரண்டு கட்டைபைகளுடன் சுவர் ஏறி குதித்து தப்பி சென்றுள்ளது. இது குறித்து அக்கம் பக்கத்தினர் குன்றக்குடி போலீசுக்கு தகவல் தெரிவித்தார். அதன் அடிப்படையில் போலீசார் வழக்கு பதிந்து விசாரணை நடத்தி வருகின்றனர். அதிர்ஷ்டவசமாக கொள்ளை சம்பவம் நடக்காமல் இருந்தது போலீசார் விசாரணையில் தெரிய வந்தது.