காரைக்குடி கம்பன் நகரில் ரூ.1.05 கோடி மதிப்பில் சாலை பணி

காரைக்குடி, ஆக.14- காரைக்குடி கம்பன் நகரில், 2025–2026 ஆம் ஆண்டிற்கான டூரிப் சாலை திட்டத்தின் கீழ், ரூ.1.05 கோடி மதிப்பீட்டில் 1,200 மீட்டர் நீளத்திற்கு புதிய சாலை அமைக்கும் பணிக்கு இன்று அடிக்கல் நாட்டு விழா நடைபெற்றது. இயற்கை மற்றும் கனிமவளத்துறை அமைச்சர் டாக்டர் டி.கே.பிரபு அடிக்கல் நாட்டி தொடங்கி வைத்தார். தொடர்ந்து, சாலை அமைக்கும் பணியை ஒப்பந்தம் எடுத்துள்ள எம்.ஆர்., கன்ஸ்ட்ரக்‌ஷன் நிறுவன ஒப்பந்ததாரரிடம், சாலைப் பணிகளை தரமான முறையில் மேற்கொள்ள வேண்டும் என அமைச்சர் அறிவுறுத்தினார்.

மேலும், கடந்த காலங்களில் சாலைகள் அமைக்கப்பட்டதைப் போன்று தரமற்ற முறையில் பணிகளை மேற்கொள்ளக்கூடாது என்றும், இந்த ஆட்சியில் மக்கள் பாராட்டும் வகையில் தரமான சாலை அமைக்க வேண்டும் என்றும் ஒப்பந்ததாரருக்கு அமைச்சர் டி.கே.பிரபு உத்தரவிட்டார். சாலைப் பணியின் தரம் மற்றும் கட்டுமானப் பணிகள் குறித்து அதிகாரிகள் தொடர்ந்து கண்காணிக்க வேண்டும் என்றும் அமைச்சர் அறிவுறுத்தினார்.