அனுமதி இன்றி செயல்படும் மழலையர் பள்ளிகளை மூட ஆட்சியர் உத்தரவிட்டும் நடவடிக்கை எடுக்க தயக்கம்

காரைக்குடி, ஜூன் 11- ‎காரைக்குடி சிக்ரி வளாகத்தில் மத்திய அரசின் சிசு மழலையர் பள்ளி ‎, ஸ்கூபி கிட்ஸ் பள்ளி, கற்பிப்போம் மழலையர் பள்ளி, வி.டி. கிண்டர் கார்டன், சாஸ்தா கிட்ஸ் பள்ளி, யூகே கிட்ஸ் இன்டர்நேசனல் ஸ்கூல், லிட்டில் பீ கிட்ஸ் ஸ்கூல், லிட்டில் ஜீனியஸ் கிட்ஸ் ஸ்கூல், இன்டல் கிட்ஸ் ஸ்கூல், சாமி மீனாள் கிட்ஸ் ஸ்கூல், சிசு வித்யாலாயா பள்ளி, ஹேப்பி கிட்ஸ் ப்ளே ஸ்கூல் மற்றும் பனங்குடியில் இயங்கும் காரைக்குடி கிட்ஸ் ஸ்கூல், திருப்பத்தூர் எஸ்.கே.ஒய். கிட்ஸ் பள்ளி, சிங்கம்புணரி கேரியன்ஸ் ப்ளே ஸ்கூல், கண்டனூர் கிரீன் பார்க் ப்ளே ஸ்கூல், மானாமதுரை குட்வில் ப்ளே ஸ்கூல் உள்ளிட்ட 16 மழலையர் பள்ளிகள் அனுமதியின்றி இயங்கி வருகின்றன. ‎‎இலவச கட்டாயக் கல்வி உரிமைச் சட்டம் 2009 பிரிவு 18(4) மற்றும் 18(5)-ன் படி அனுமதி பெறாமல் பள்ளிகளை நடத்துவது சட்டப்படி குற்றம். இதனால் அனுமதி பெறாத பள்ளிகளை மூட வேண்டும் என மாவட்ட ஆட்சியர் ப. ஆகாஷ் உத்தரவிட்டார். ‎மேலும் அவர், அனுமதி பெறாத பள்ளிகள் தொடர்ந்து இயங்கினால், நிர்வாகம் மீது சட்டப்படி கடுமையான குற்றவியல் நடவடிக்கை எடுக்கப்படும்.

‎இப்பள்ளிகளில் பெற்றோர் தங்கள் குழந்தைகளை சேர்க்க வேண்டாம் எனவும் எச்சரிக்கை விடுத்துள்ளார். இந் நிலையில் காரைக்குடியில் மாவட்ட ஆட்சியர் மூட உத்தரவிட்ட அனைத்து மழலையர் பள்ளிகளும் செயல்பட்டு வருகிறது. வழக்கம் போல பெற்றோர்கள் தங்கள் குழந்தைகளை பள்ளிகளுக்கு அழைத்து வந்தனர். குழந்தைகளை மழலையர் பள்ளிக்குள் நிர்வாகம் அனுமதித்து செயல்பட்டு வருவது அதிர்ச்சியை ஏற்படுத்தியுள்ளது. மேலும் மாவட்ட ஆட்சியரின் உத்தரவை அமல்படுத்த அதிகாரிகள் தயக்கம் காட்டி வருகின்றனர்.