காரைக்குடி ரயில்வே நிலைய ஓய்வறையில் மூதாட்டியிடம் நகை, பணம் திருட்டு

காரைக்குடி, ஜூலை 28- காரைக்குடி ரயில்வே நிலைய ஓய்வறையில் தங்கி இருந்த மூதாட்டியிடம் இருந்து ஒரு சவரன் தங்க நகை மற்றும் ₹18,000 பணம் திருடப்பட்ட சம்பவம் பரபரப்பை ஏற்படுத்தியுள்ளது. சென்னையில் வசித்து வருபவர் ஜமுனா. மூதாட்டியான இவர், தனது சொந்த ஊரான சிவகங்கை மாவட்டம் திருப்பத்தூர் அருகே உள்ள திருக்களாப்பட்டி கிராமத்திற்கு வந்திருந்தார். பின்னர் சென்னை திரும்புவதற்காக, இன்று காலை 5.50 மணிக்கு காரைக்குடியில் இருந்து புறப்படும் பல்லவன் விரைவு ரயிலில் பயணம் செய்யும் நோக்கில் நேற்று இரவு காரைக்குடி ரயில்வே நிலையம் வந்தார்.

அவர் ரயில்வே நிலையத்தில் உள்ள ஓய்வறையில் தங்கி இருந்தபோது, அவரது கைப்பையில் வைத்திருந்த ஒரு சவரன் தங்க நகை மற்றும் ₹18,000 பணம் மர்ம நபர்களால் திருடப்பட்டதாக கூறப்படுகிறது. இதையடுத்து அதிர்ச்சி அடைந்த ஜமுனா, காரைக்குடி ரயில்வே காவல் நிலையத்தில் புகார் அளித்தார். புகாரின் பேரில் ரயில்வே போலீசார் வழக்குப்பதிவு செய்து, ரயில்வே நிலையத்தில் பொருத்தப்பட்டுள்ள சிசிடிவி கேமரா காட்சிகளை ஆய்வு செய்து, திருட்டில் ஈடுபட்ட நபர்களை கண்டறியும் பணியில் தீவிர விசாரணை மேற்கொண்டு வருகின்றனர்.