செல்லப்பன் வித்யா மந்திர் சர்வதேச பள்ளியில் மாணவர் தலைமைப் பொறுப்பேற்பு விழா

காரைக்குடி, ஜூன் 22- காரைக்குடி செல்லப்பன் வித்யா மந்திர் சர்வதேசப்பள்ளியில் 2026–27 கல்வியாண்டிற்கான மாணவர் தலைமைத் தேர்வுக்கான தேர்தலில் மாணவர்கள் வேட்புமனு தாக்கல் செய்தனர். தொடர்ந்து தகுதியான வேட்பாளர்களுக்காக மாதிரி கணினி மின்னணு வாக்குப்பதிவு இயந்திரம் மூலம் தேர்தல் நடத்தப்பட்டது. இத்தேர்தலில் மூன்று முதல் பன்னிரெண்டாம் வகுப்பு வரை பயிலும் மாணவர்கள் வாக்களிக்கும் உரிமை பெற்று தங்களது கடமையை நிறைவேற்றினர். வாக்குகள் எண்ணப்பட்டு முடிவுகள் அறிவிக்கப்பட்டதில், பன்னிரெண்டாம் வகுப்பு மாணவர் கார்த்திக் சூர்யா 688 வாக்குகள் பெற்று பள்ளித் தலைவராகவும், பழனி குமரன் 396 வாக்குகள் பெற்று துணைத் தலைவராகவும் தேர்ந்தெடுக்கப்பட்டனர். இவர்களுக்கான பதவியேற்பு விழா பள்ளி விழா அரங்கில் நடைபெற்றது. மத்திய தொழில் பாதுகாப்புப் படை தலைமை தளபதி அசோக் ஜல்வாணியா மாணவர்களுக்கு பதவிப் பிரமாணம் செய்து வைத்தார். பள்ளியின் தாளாளர் செ.சத்தியன் தலைமை வகித்தார். பள்ளி நிர்வாக இயக்குநர் சங்கீதா சத்தியன் முன்னிலை வகித்தார். கல்வி இயக்குநர் டாக்டர். ராஜேஸ்வரி நிகழ்ச்சியை ஒருங்கிணைத்தார். பள்ளி முதல்வர் லூயிசா ரெமி வரவேற்புரை வழங்கினார்.

சிறப்பு விருந்தினர் தனது உரையில், "இன்று நீங்கள் பள்ளியில் கற்றுக்கொள்ளும் தலைமைப் பண்புகளும் ஒழுக்கமும், நாளை சமூகத்தில் உங்களை உயர்ந்த இடத்தில் நிலைநிறுத்த அடித்தளமாக அமையும். இந்தப் பள்ளியில் ஜனநாயக முறையில் நடைபெற்ற தேர்தல், மாணவர்களை எதிர்கால இந்தியாவின் பொறுப்புள்ள குடிமக்களாகவும் தலைவர்களாகவும் உருவாக்கும். இன்று பள்ளியில் நீங்கள் அளிக்கும் வாக்கு, நாளைய இந்தியத் தேர்தலில் பொறுப்புடன் வாக்களிக்கும் பண்பை வளர்க்கும் முன்னோட்டமாகும்" என்று குறிப்பிட்டார். தொடர்ந்து பள்ளி மாணவத் தலைவர், துணைத் தலைவர் மற்றும் விளையாட்டுப் பிரிவு தலைவர் பதவிகள் வழங்கப்பட்டு, அவர்களுக்கான பொறுப்புகள் ஒப்படைக்கப்பட்டன.