காரைக்குடியில் வங்கி ஊழியர்கள் ஆர்ப்பாட்டம்

காரைக்குடி, செப். 11- வங்கி ஊழியர்களின் நீண்டகால கோரிக்கையான அனைத்து சனிக்கிழமைகளிலும் விடுமுறை வழங்க வேண்டும் என்ற கோரிக்கையை மத்திய அரசு தொடர்ந்து காலதாமதப்படுத்தி வருகிறது. 24 ஆண்டுகளுக்கு மேலாகியும் இந்த விவகாரம்நிலுவையில் உள்ளது. மேலும் வங்கிகளில் எழுத்தர் மற்றும் துணை ஊழியர்களை போதுமான அளவில் பணியமர்த்துதல், தேசிய ஓய்வூதியத் திட்டத்தை பழைய ஓய்வூதியத் திட்டமாக மாற்றுதல், பணிக்கொடை உச்சவரம்பை அதிகரித்தல், வங்கிகளில் தொழிலாளர் மற்றும் அதிகாரி இயக்குனர் பதவிகளை வேண்டும் என்றே நிரப்பாமல் இருப்பது உள்ளிட்ட பல்வேறு கோரிக்கைகளை வலியுறுத்தி நாடு முழுவதும் சுமார் 8½ லட்சம் வங்கி ஊழியர்கள் இன்று வேலைநிறுத்தப் போராட்டத்தில் பங்கேற்று வருகின்றனர். அதன்படி அனைத்து வங்கி ஊழியர் சங்கங்களின் முன்னணி சிவகங்கை மாவட்ட அளவிலான வேலை நிறுத்த ஆர்ப்பாட்டம் காரைக்குடி சுப்பிரமணியபுரத்தில் அமைந்துள்ள பாரத ஸ்டேட் வங்கி முன்பாக நடைபெற்றது. சிவகங்கை மாவட்ட வங்கி ஊழியர் சங்கத்தின் பொதுச்செயலாளர் மற்றும் மாவட்ட அனைத்து வங்கி ஊழியர் சங்கங்களின் முன்னணி அமைப்பின் கன்வீனர் பிரேம் ஆனந்த் தலைமை தாங்கினார். பாரத ஸ்டேட் வங்கி அதிகாரிகள் சங்கத்தின் மண்டல பொறுப்பாளர் செந்தில்குமார் முன்னிலை வகித்தார். இந்தியன் வங்கி ஊழியர் சங்கத்தின் பொறுப்பாளர் இராமகிருஷ்ணன் வரவேற்றுப் பேசினார். அனைத்து வங்கிகளைச் சார்ந்த ஆண், பெண் வங்கி ஊழியர்கள் மற்றும் அதிகாரிகள் ஆர்ப்பாட்டத்தில் கலந்துகொண்டனர்.

சிவகங்கை மாவட்ட வங்கி ஊழியர் சங்க பொதுச்செயலாளர் பிரேம் ஆனந்த் கூறுகையில், 2024-ம் ஆண்டு ஒன்றிய அரசால் அமைக்கப்பட்ட ஐ.எப்.ஏ., எனப்படும் இந்திய வங்கிகள் சங்கம் மற்றும் வங்கி ஊழியர், அதிகாரிகள் சங்கத்தின் சார்பாக அமைக்கப்பட்ட அனைத்து வங்கி ஊழியர் சங்கங்களின் முன்னணிஅமைப்பும் நடத்திய இருதரப்பு பேச்சுவார்த்தை ஒப்பந்தத்தில், இந்திய வங்கிகள் சங்கத்தால் ஒத்துக்கொள்ளப்பட்ட ஐந்து நாள் வேலை திட்டத்தை அரசாங்கம் நடைமுறைப்படுத்தாமல் நிறுத்தியுள்ளதை கண்டித்து இந்த வேலை நிறுத்தம் நடைபெறுகிறது. மேலும், Profit Linkage incentive எனப்படும் லாபம் தொடர்பான ஊக்கத்தொகை திட்டத்தின் அடிப்படையில் வங்கி ஊழியர்கள் மற்றும் அதிகாரிகளுக்கு ஒரே விதமான ஊக்கத்தொகை வழங்குவதை அத்துமீறி நிர்வாகஅதிகாரிகள் நிலை 4 மற்றும் அதற்கு மேல் உள்ள வங்கி உயர் அதிகாரிகளுக்கு ஒழுங்கற்ற முறையில் பலமடங்கு ஊக்கத்தொகை வழங்கப்பட்டுள்தை கண்டிக்கிறோம், என்றார். கோரிக்கைகளுக்கு ஒன்றிய அரசு செவிசாய்க்காவிட்டால் இந்த மாதம் 28, 29, 30 ஆகிய நாட்களில் வேலைநிறுத்தம் நடைபெறும் என்றும், மேலும், அக்டோபர் 26 முதல் காலவரையறையற்ற வேலைநிறுத்தம் நடைபெறும் எனவும் தெரிவித்தார். மாவட்ட வங்கி ஊழியர் சங்க இணை செயலாளர் பாலசங்கர் நன்றி கூறினார்.