12258 ஆய்வுகள் மூலம் 79 காப்புரிமைகளை பெற்ற அழகப்பா பல்கலைக்கழகம்

காரைக்குடி, ஆக.14- காரைக்குடி அழகப்பா பல்கலைக்கழகம் 12,258 ஆய்வுக்கட்டுரைகளை வெளியிட்டு, 79 காப்புரிமைகளை பெற்றுள்ளது என துணைவேந்தர் பேராசிரியர் ரவி தெரிவித்தார். காரைக்குடி அழகப்பா பல்கலைக்கழகத்தில் 80-வது சுதந்திர தினவிழாவை முன்னிட்டு, துணைவேந்தர் கர்னல் பேரா. க. ரவி தேசியக்கொடியை ஏற்றிவைத்து பல்கலைக்கழக தேசிய மாணவர் படை பிரிவினர் மற்றும் மாணவ, மாணவியரின் அணிவகுப்பு மரியாதையை ஏற்றுக்கொண்டார். தொடர்ந்து அவர் தனது உரையில்."செயலில் செம்மை" என்ற குறிக்கோளுடன் இயங்கும் அழகப்பா பல்கலைக்கழகம் நாட்டின் கல்வி மற்றும் வளர்ச்சிக்கு தனது சிறப்பான பங்களிப்பை செய்துவருகிறது. தேசிய மற்றும் பன்னாட்டு அளவில் பல்வேறு தரவரிசையில் இடம் பெற்றுள்ளது. வளர்ந்து வரும் புதியதுறைகளான "செயற்கை நுண்ணறிவு மற்றும் தரவு அறிவியல், சைபர் தடயவியல், ஊட்டச்சத்து மற்றும் உணவுமுறை, பாலிமர்வேதியல் மற்றும் உயிர்வேதியியல்" ஆகியவைகளில் புதிய பாடத்திட்டங்களை அறிமுகப்படுத்தியுள்ளது. 2026 ஆகஸ்ட் நிலவரப்படி அழகப்பா பல்கலைக்கழகம் 12,258 ஆய்வுக்கட்டுரைகளை வெளியிட்டு, 79 காப்புரிமைகளை பெற்றுள்ளது. மேலும் பன்னாட்டு ஆய்விதழ்களில் வெளியிடப்பட்டுள்ள ஆய்வுக்கட்டுரைகளின் வாயிலாக எச் இன்டெக்ஸ் 135 ஆக உயர்ந்துள்ளது. தொழில்முனைவோர் மற்றும் புத்தாக்க மையம் மூலம் புத்தாக்கச் சூழலை வலுப்படுத்தியுள்ளது. பசுமை வளாகத்திட்டத்தின் கீழ் பல்கலைக்கழக வளாகத்தில் கடந்த நான்கு ஆண்டுகளில் 17000 மரக்கன்றுகள் நடப்பட்டுள்ளன, என்றார்.

இந்நிகழ்வின் ஒரு பகுதியாக முனைவர் பட்டம் பெற்ற துணைப் பதிவாளர் முனைவர்.எம்.முருகேசனுக்கு துணைவேந்தர் பாராட்டுச் சான்றிதழ் வழங்கி கௌரவித்தார். நிகழ்ச்சியில் பல்கலைக்கழக ஆட்சிக்குழு உறுப்பினர்கள், பேராசிரியர்கள் ஜெ.ஜெயகாந்தன், சி.வேதிராஜன் மற்றும் கே.பாலமுருகன், பதிவாளர் முனைவர்.அ.செந்தில்ராஜன், தேர்வாணையர் முனைவர் எம்.ஜோதிபாசு, நிதி அலுவலர் பேரா.எம்.சந்திரமோகன், தொலைதூரக் கல்வி இயக்குநர் பேரா.எ.கண்ணபிரான், புல முதன்மையர்கள், இயக்குனர்கள், துறைத்தலைவர்கள், பேராசிரியர்கள், அலுவலர்கள் மற்றும் மாணவர்கள் கலந்துகொண்டனர். உடற்கல்வியியல் கல்லூரி பேராசிரியர்கள் இந்நிகழ்ச்சிக்கான ஏற்பாடுகளை சிறப்பாக செய்திருந்தனர்.