முள்ளங்காடு கிராமத்தில் பூட்டி வைக்கப்பட்டிருந்த 5 ஐம்பொன் சிலைகள் மீட்பு

காரைக்குடி, ஆக.19- காரைக்குடி அருகே உள்ள முள்ளங்காடு மற்றும் புளியங்குடியிருப்பு கிராமமக்கள் ஓராண்டு ஒரு ஊரிலும் மற்றொரு ஆண்டு ஒரு ஊரிலும் விநாயகர், அய்யனார், பூரணித்தாள், பொற்கொடியாத்தாள் மற்றும் கருப்பசாமி என 5 ஐம்பொன் உற்சவர் சிலைகள் வைத்து திருவிழா நடத்தி வந்ததாக கூறப்படுகிறது இந்த சிலைகளை இரு கிராம மக்களும் ஆண்டுதோறும் முறை வைத்து, மாற்றி மாற்றி பராமரித்து வழிபட்டு வந்ததாகவும் இந்நிலையில், சுமார் 10 ஆண்டுகளுக்கு முன்பு திருவிழா தொடர்பாக இரு கிராம மக்களிடையே ஏற்பட்ட கருத்து வேறுபாடு மற்றும் தகராறைத் தொடர்ந்து, 5 ஐம்பொன் சிலைகளையும் முள்ளங்காடு கிராமத்தினர் கோவிலில் வைத்து பூட்டி வைத்ததாக கூறப்படுகிறது. இதுதொடர்பாக புளியங்குடியிருப்பு கிராம மக்கள் தொடர்ந்த வழக்கில், ஐம்பொன் சிலைகளை முள்ளங்காடு கிராமத்தினர் ஒப்படைக்க வேண்டும் என நீதிமன்றம் உத்தரவிட்டதாக கூறப்படுகிறது. மேலும், சிலைகளை ஒப்படைப்பதற்கு குறிப்பிட்ட கால அவகாசம் எதுவும் நீதிமன்ற உத்தரவில் குறிப்பிடப்படவில்லை என புளியங்குடியிருப்பு கிராம மக்கள் தரப்பில் தெரிவிக்கப்பட்டது.

இதையடுத்து, சிலைகளை எடுத்துச் செல்வது தொடர்பாக இரு கிராம மக்களிடையே நேற்று தேவகோட்டை கோட்டாட்சியர் அலுவலகத்தில் சமாதான பேச்சுவார்த்தை நடைபெற்றது. ஆனால், பேச்சுவார்த்தையில் உடன்பாடு ஏற்படவில்லை. இந்த நிலையில், இன்று காலை தேவகோட்டை கோட்டாட்சியர் மற்றும் வருவாய்த்துறை அதிகாரிகள், 300-க்கும் மேற்பட்ட காவல்துறையினர் பாதுகாப்புடன் முள்ளங்காடு கிராமத்திற்கு சென்றனர். அங்கு கோவிலில் பூட்டி வைக்கப்பட்டிருந்த 5 ஐம்பொன் சிலைகளும் மீட்கப்பட்டு, புளியங்குடியிருப்பு கிராம மக்களிடம் ஒப்படைக்கப்பட்டன. இதுகுறித்து முள்ளங்காடு கிராம மக்கள் சிலைகளை இந்து சமய அறநிலைத்துறை வசம் ஒப்படைக்கப்படும் என்று கூறி எடுத்துச் சென்று புளியங்குடி கிராம மக்களிடையே ஒப்படைத்துள்ளதாகவும் அதிகாரிகளிடம் நீதிமன்றத்தில் முறையிட்டுள்ளோம் கால அவகாசம் வேண்டும் என்று கேட்டும் அவர்கள் தரவில்லை என்று தெரிவித்தனர் புளியங்குடி முள்ளங்காடு ஆகிய இரு கிராமங்களில் காவல்துறையினர் பாதுகாப்பு போடப்பட்டுள்ளது.